Taorian’ny fitsidihana sy hetsika fanentanana natao teny amin’ny Oniversiten’ Ankatso dia nanohy ny fampandraisana andraikitra teny amin’ny Oniversiten’ny Barikadimy, ny 𝟐𝟐 𝐦𝐞𝐲 𝟐𝟎𝟐𝟔, ny Minisitry ny Rano, ny Fanadiovana sy ny Fidiovana,

𝐃𝐫 𝐑𝐀𝐙𝐀𝐅𝐈𝐍𝐃𝐑𝐈𝐀𝐍𝐈𝐀𝐈𝐍𝐀 𝐌𝐢𝐧𝐨𝐬𝐨𝐚 𝐀𝐧𝐣𝐚𝐫𝐚𝐭𝐢𝐚𝐧𝐚 𝐄𝐥𝐢𝐚.

Nandritra izany no nanolorana fitaovana fanadiovana ho an’ny mpianatra, ho fanamafisana ny ady amin’ny loto sy ny fampiroboroboana ny fahadiovana eny anivon’ny anjerimanontolo. Tsy nijanona teo amin’ny fanomezana fitaovana ihany anefa ny hetsika, fa nisy ihany koa ny fanentanana momba ny fiarovana sy fikajiana ireo fotodrafitrasa iombonana.

Notsindrian-dRamatoa Minisitra manokana ny maha-zava-dehibe ny fitsitsiana rano sy ny fitandroana sy fanajana ireo fotodrafitrasa iombonana, taorian’ny nahitana « robinet »misokatra ka nahatonga rano very fotsiny. Nambarany fa andraikitry ny rehetra ny miaro sy mitsitsy ny rano, satria harena iankinan’ny aina sy ny fahasalaman’ny besinimaro izany.

Nanentana ireo mpianatra ihany koa izy mba hanana toe-tsaina tompon’andraikitra amin’ny fitandroana ny fahadiovana sy ny fanajana ny tontolo iainana, satria ny toeram-pianarana madio sy voakarakara dia manampy amin’ny fananganana tontolo mendrika hianarana sy hivelaran’ny tanora.