Ho fanatsarana hatrany ny fitantanana ny asam-bahoaka momba ny rano sy ny fanadiovana, ary ho fanatrarana 𝐧𝐲 𝐎𝐃𝐃 𝟔, 𝐧𝐲 𝐏𝐆𝐄 𝐚𝐫𝐲 𝐧𝐲 𝐏𝐍𝐄𝐀𝐇, dia natsangana tamin’ny alalan’ny Lalàna laharana 𝟐𝟎𝟐𝟓-𝟎𝟐𝟔 tamin’ny 5 Martsa 2026, 𝐦𝐢𝐟𝐞𝐡𝐲 𝐧𝐲 𝐑𝐚𝐧𝐨, ny « 𝙊𝙧𝙜𝙖𝙣𝙞𝙨𝙢𝙚 𝙍é𝙜𝙪𝙡𝙖𝙩𝙚𝙪𝙧 𝙙𝙪 𝙎𝙚𝙧𝙫𝙞𝙘𝙚 𝙋𝙪𝙗𝙡𝙞𝙘 𝙙𝙚 𝙡’𝙀𝙖𝙪 𝙚𝙩 𝙙𝙚 𝙡’𝘼𝙨𝙨𝙖𝙞𝙣𝙞𝙨𝙨𝙚𝙢𝙚𝙣𝙩 » (OREA).

Eo ambany fiahiana ara-teknikan’ny Minisiteran’ny Rano, ny Fanadiovana ary ny Fidiovana (MEAH), ny OREA dia manana andraikitra lehibe amin’ny fandrindrana, fanaraha-maso ary fanatsarana ny asam-bahoaka momba ny rano sy ny fanadiovana.

Anisan’ny dingana lehibe amin’izany ny fanatanterahana ny andrana ara-teknika ny rindrambaiko 𝐒𝐄𝐒𝐀𝐌 nohavaozina. Ity fitaovana nomerika ity dia natao hanampiana ny OREA amin’ny fanaraha-maso akaiky kokoa ny fahaiza-mitantana sy ny fahombiazan’ireo mpitantana fotodrafitrasa famatsian-drano.

Efa notanterahina tany amin’ny Faritra Boeny sy Atsimo-Andrefana ny dingana voalohany, ary vao avy nofaranana tany amin’ny Faritra Anosy sy Androy izany.

Niompana tamin’ny atrikasa sy fidinana ifotony ireo andrana ireo, niarahana tamin’ny ekipan’ny MEAH, ireo Kaominina tompon’andraikitra ary ireo mpitantana fotodrafitrasa. Nahafahana nanangona ihany koa ny soso-kevitra sy ny fanamarihan’ireo mpisehatra eny ifotony, mba hanatsarana ny rindrambaiko sy hampifanarahana azy amin’ny drafitra fifanarahana fitantanana ifanaovan’ny Kaominina sy ny mpitantana.

Dingana iray lehibe ho amin’ny fitantanana mangarahara, mahomby ary mifototra amin’ny angon-drakitra ny fanavaozana ny rafitra fanaraha-maso.

Hivoaka tsy ho ela ny dika faran’ny rindrambaiko SESAM, izay hampiasaina hanamafisana bebe kokoa ny fanaraha-maso sy ny fanombanana ny fitantanana ny tolotra momba ny rano sy ny fanadiovana.