Mitohy ny ezaka ataon’ny Fitondram-panjakana malagasy amin’ny alalan’ny Minisiteran’ny Rano, ny Fanadiovana ary ny Fidiovana (MEAH) amin’ny fanamafisana ny fahafahan’ny mponina misitraka rano fisotro madio, fanadiovana ary fidiovana mendrika, indrindra any amin’ireo faritra marefo any Atsimon’i Madagasikara.

Nisy araka izany ny fidinana tany amin’ny faritra Anosy, ny 11 sy 12 may 2026, izay notarihin-dRamatoa Minisitra 𝘿𝙧 𝙍𝘼𝙕𝘼𝙁𝙄𝙉𝘿𝙍𝙄𝘼𝙉𝙄𝘼𝙄𝙉𝘼 𝙈𝙞𝙣𝙤𝙨𝙤𝙖 𝘼𝙣𝙟𝙖𝙧𝙖𝙩𝙞𝙖𝙣𝙖 𝙀𝙡𝙞𝙖, niaraka tamin’ny 𝙈𝙖𝙨𝙤𝙞𝙫𝙤𝙝𝙤𝙣’𝙞 𝙅𝙖𝙥𝙤𝙣, 𝙣𝙮 𝙐𝙉𝙄𝘾𝙀𝙁, 𝙣𝙮 𝙅𝙄𝘾𝘼, 𝙞𝙧𝙚𝙤 𝙊𝙉𝙂 𝙢𝙥𝙞𝙖𝙧𝙖-𝙢𝙞𝙤𝙢𝙗𝙤𝙣𝙖𝙣𝙩𝙤𝙠𝙖 𝙖𝙧𝙮 𝙣𝙮 𝙨𝙚𝙝𝙖𝙩𝙧𝙖 𝙩𝙨𝙮 𝙢𝙞𝙖𝙣𝙠𝙞𝙣𝙖. Nohamafisina tamin’ny alalan’izany ny fiaraha-miasa entina hitondrana vahaolana maharitra sy mahazaka ny fiovan’ny toetrandro eo amin’ny sehatry ny Rano, Fidiovana sy Fanadiovana.

Ao anatin’ny toerana notsidihana ny Fokontany Ankirikiriky, Kaominina Behara, Distrikan’ny Amboasary, izay sokajiana ho « 𝐞𝐜𝐨-𝐯𝐢𝐥𝐥𝐚𝐠𝐞 », satria dia angovo azo havaozina no ampiasaina toy ny fametrahana ny MUS (Système Multi-Usage), fampiasana herinaratra mandeha amin’ny herin’ny masoandro, fampiasana lavapiringa madio sy tsy misy fofona.

Marihina fa :

Mpianatra maherin’ny 𝟐𝟎𝟎 no misitraka fotodrafitrasa rano sy fanadiovana

Tokantrano maherin’ny 𝟏𝟐𝟎𝟎 no efa nahazo trano fivoahana nohatsaraina sy maharitra ;

Miroborobo ny famokarana eto an-toerana ireo “dalles SATO”, izay mampihena ny vidin’ny fitaovana fanadiovana sy manohana ny toekarena eny ifotony.

Anisan’ny laharam-pahamehan’ny MEAH ny fampiroboroboana ny “Assainissement Basé sur le Marché” (MBS), izay mikendry ny hanamorana ny fahazoan’ny vahoaka trano fivoahana madio sy ara-pahasalamana, maharitra ary mora vidy. Amin’ny alalan’ity fomba fiasa ity dia tohanana ireo mpandraharaha eny ifotony, ampirisihina ny famokarana eto an-toerana ary hamafisina ny fahafahan’ny mponina misitraka tolotra fanadiovana ara-pahasalamana.

Amin’ny alalan’ireo hetsika ireo dia manamafy ny andraikiny ny MEAH amin’ny ady amin’ny fangerena an-kalamanjana sy ny fampiroboroboana ny fahadiovana ho an’ny rehetra.