Nandritra ny resadresaka natao tamin’ny mpanao gazety, ny Minisitry ny Rano, ny Fanadiovana sy ny Fidiovana, 𝘿𝙍 𝙍𝘼𝙕𝘼𝙁𝙄𝙉𝘿𝙍𝙄𝘼𝙉𝙄𝘼𝙄𝙉𝘼 𝙈𝙞𝙣𝙤𝙨𝙤𝙖 𝘼𝙣𝙟𝙖𝙧𝙖𝙩𝙞𝙖𝙣𝙖 𝙀𝙡𝙞𝙖, dia nanamafy fa miezaka mampiakatra hatrany ny tahan’ny mponina misitraka rano fisotro madio sy fotodrafitrasa fanadiovana sy fidiovana ny Fitondram-panjakana.

Misy araka izany ireo asa natao lahara-pahamehana entina hanatsarana ny fisitrahana rano fisotro madio amin’ny distrika maro eto Madagasikara, toy ny Antananarivo Renivohitra, Avaradrano sy Atsimondrano, Nosy Be, Antalaha, Belo sur Tsiribihina, Marovoay…

Ao anatin’izany ny:

Fanoloana haingana ireo fantsona izay efa tranainy sy ahitana fahasimbana

Fanoloana sy fanamboarana paompy sy fitaovana teknika tsy mandeha.

Fanamboarana sy fanavaozana ireo fotodrafitrasa famatsian-drano.

Fandraisana andraikitra maika amin’ireo faritra tena iharan’ny tsy fahampian-drano, toy ny fizarana rano ho an’ny vahoaka, fametrahana siniben-drano any amin’ireo faritra tena saro-drano.

Etsy andaniny dia:

Hamafisina ny fanaraha- maso akaiky ny fampiasana ny fitaovana sy ny fanatanerahana ny asa, izay iarahan’ny MEAH sy ny JIRAMA.

Hatsaraina ihany koa ny kalitaon’ny tolotra sy ny faharetan’ny famatsian-drano.