Ao anatin’ny fanohizana ny fampiharana ny Memorandum of Understanding (MoU) nosoniavin’i Madagasikara sy i Ejipta, dia nivory tao amin’ny Centre national de recherche sur les ressources en eau na ny Foibem-pikarohana Nasionaly momban’ny loharanon-drano ny delegasiona avy amin’ny firenena roa tonta mba handrafitra ny dingana fanatanterahana ireo laharam-pahamehana efa nifanarahana.

Nifantoka tamin’ny fanamafisana ny fahaiza-manaon’ireo teknisianina sy injeniera, ny fampandrosoana ireo fotodrafitrasa momba ny rano, ny fifampizarana traikefa sy teknolojia ary ny fampandrosoana ny ivon-toeram-pikarohana momba ny rano sy ny fanondrahana eto Madagasikara ny dinika.

Nifanaraka ihany koa ny roa tonta hamolavola drafitrasa iarahana manatanteraka mandritra ny dimy taona, miaraka amin’ny rafitra fanaraha-maso tsy tapaka. Hanomana ny sarintanin’ireo faritra mbola sahirana amin’ny fahazoana rano i Madagasikara, ary handefa ny volavolan-drafitrasa sy ny fandaharan’asa fanofanana kosa i Ejipta.

Manamarika dingana vaovao ity fihaonana ity hoy ny Minisitry ny Rano, ny Fanadiovana sy ny Fidiovana 𝘿𝙧 𝙍𝘼𝙕𝘼𝙁𝙄𝙉𝘿𝙍𝙄𝘼𝙉𝙄𝘼𝙄𝙉𝘼 𝙈𝙞𝙣𝙤𝙨𝙤𝙖 𝘼𝙣𝙟𝙖𝙧𝙖𝙩𝙞𝙖𝙣𝙖 𝙀𝙡𝙞𝙖, satria mifindra avy amin’ny fifanarahana mankany amin’ny fanatanterahana mivaingana ny fiaraha-miasa, ho fanatsarana ny fitantanana ny loharanon-drano sy ny fanamafisana ny fahazoan’ny vahoaka rano fisotro madio.