Nandray anjara tamin’ny fivoriana niarahana tamin’ny Banky Iraisam-pirenena ny 18 jona 2026 tao Anosy, Ramatoa Minisitry ny Rano, ny Fanadiovana sy ny Fidiovana, 𝘿𝙧 𝙍𝘼𝙕𝘼𝙁𝙄𝙉𝘿𝙍𝙄𝘼𝙉𝙄𝘼𝙄𝙉𝘼 𝙈𝙞𝙣𝙤𝙨𝙤𝙖 𝘼𝙣𝙟𝙖𝙧𝙖𝙩𝙞𝙖𝙣𝙖 𝙀𝙡𝙞𝙖, niaraka tamin’ireo mpikambana vitsy ao amin’ny Governemanta.

Io fihaonana io dia natao handinihana ny fizotry ny fanatanterahana ireo tetikasa tohanan’ny Banky Iraisam-pirenena sy hamaritana ireo laharam-pahamehana hanamafisana ny vokatra ho an’ny mponina.

Nandritra ny fifanakalozan-kevitra dia nasongadina ny maha zava-dehibe ny fiaraha-miasa eo amin’ny Governemanta sy ireo mpiara-miombonantoka amin’ny fampandrosoana, indrindra amin’ny fanatanterahana ireo politika sy tetikasa mitondra fanatsarana mivaingana eo amin’ny fiainan’ny vahoaka.

Ho an’ny Ministeran’ny Rano, ny Fanadiovana sy ny Fidiovana, dia fotoana iray nanamafisana indray ny fanoloran-tena hanohy ny ezaka amin’ny fanitarana ny fahazoan’ny mponina rano fisotro madio, fanadiovana ary fidiovana mendrika, amin’ny alalan’ny fiaraha-miasa akaiky amin’ireo mpiara-miombon’antoka ara-teknika sy ara-bola.