Taorian’ny fanaovan-tsonia ny Memorandum of Understanding (MoU) teo amin’ny Ministeran’ny Rano, ny Fanadiovana sy ny Fidiovana (MEAH) sy ny Ministeran’ny Loharanon-drano sy ny Fanondrahana ao amin’ny Repoblika Arabo Ejipta, dia miroso amin’ny dingana fanatanterahana ny fiaraha-miasa ny roa tonta.

Amin’izao dingana izao dia misy ny fifampidinihana ara-teknika sy ny fandrindrana ireo laharam-pahamehana, izay tarihin-dRamatoa Minisitry ny Rano, ny Fanadiovana sy ny Fidiovana 𝘿𝙧 𝙍𝘼𝙕𝘼𝙁𝙄𝙉𝘿𝙍𝙄𝘼𝙉𝙄𝘼𝙄𝙉𝘼 𝙈𝙞𝙣𝙤𝙨𝙤𝙖 𝘼𝙣𝙟𝙖𝙧𝙖𝙩𝙞𝙖𝙣𝙖 𝙀𝙡𝙞𝙖, izay hiarahana manatanteraka, mba hampiharana amin’ny fomba mahomby ireo fanoloran-tena voarakitra ao anatin’ny MoU. Tafiditra ao anatin’izany ny famolavolana ny drafi-piasana iombonana izay hitari-dalana ny fiaraha-miasa mandritra ny dimy (05) taona.

Ity fiaraha-miasa ity dia hifantoka indrindra amin’ny fifanakalozana traikefa sy fahaiza-manao, ny fanamafisana ny fahaiza-manaon’ireo mpisehatra ary ny fampiroboroboana ireo tetikasa eo amin’ny sehatry ny rano, ny fanadiovana ary ny fidiovana. Manamafy hatrany ny fifandraisana ara-teknika sy ara-pirahalahiana eo amin’i Madagasikara sy ny Repoblika Arabo Ejipta izany, sady manampy amin’ny fanatrarana ny tanjona iraisana ho amin’ny fampandrosoana maharitra sy ny fanatsarana ny tolotra ho an’ny vahoaka.